Тошкент, Ўзбекистон (UzDaily.uz) — Самарқандликлар аллақачон Yandex Go иловаси орқали электросамокатларни ижарага олиш имкониятига эга бўлишди. Яқин кунларда ушбу хизмат Бухорода ҳам ишга туширилади. Электросамокатлар тирбандликдан четлаб ўтиш ёки автобус бекатига қулай етиб бориш керак бўлган ҳолатларда жуда фойдали восита саналади. Yandex Go’даги барча электросамокатлар хавфсиз ва қулай ҳаракатланишни таъминловчи масофадан бошқариладиган тезлик назорати модули билан жиҳозланган.

Самокатни ижарага олиш учун Yandex Go иловасини энг сўнгги версиясига янгилаш кифоя. Самокатни банд қилгандан сўнг, фойдаланувчи унга етиб бориш учун 10 дақиқа бепул вақтга эга бўлади. Бошланиш баҳоси — 1990 сўм, сафар нархи эса ҳар дақиқа учун 750 сўмдан бошланади. Қулайлик учун 30, 50 ва 100 дақиқалик махсус пакетларни сотиб олиш мумкин. Шунингдек, барча фойдаланувчилар ойлик ёки ярим йиллик обуна харид қилиб, старт нархисиз ҳаракатланиш имкониятига эга бўладилар. Сафар учун тўлов иловада боғланган карта орқали автоматик тарзда ечилади.

Электросамокатни 18 ёшдан бошлаб ижарага олиш мумкин. Бир аккаунт орқали бир вақтнинг ўзида учта самокатни банд қилиш мумкин — бу дўстлар ёки яқинлар билан сафар қилишда жуда қулай. Бир неча самокатни икки усулда ижарага олиш мумкин: илова орқали “Яна битта” тугмасини босиш ёки самокат корпусидаги QR-кодни сканерлаш орқали.

Саёҳат бошланишидан олдин фойдаланувчилар электросамокатдан хавфсиз фойдаланиш бўйича содда йўриқномани олишади. Шаҳарда “секин ҳаракатланиш ҳудудлари” мавжуд бўлиб, бундай ҳудудларда самокат ҳаракат тезлигини автоматик равишда аста-секин пасайтиради. Бундай ҳудудлар ичида иловадаги харита орқали белгиланган. Юриш тақиқланган ҳудудларда эса самокатлар аста-секин тўлиқ тўхтаб қолади.