Тошкент, Ўзбекистон (UzDaily.uz) — Хитой Электроника Савдо Палатаси Президенти Ван Нинг бошчилигидаги делегация «Ўзелтехсаноат» уюшмасига ташриф буюрди.

Хитой Электроника Савдо Палатаси (СEСС) президенти Ван Нинг бошчилигидаги делегация бугун «Ўзелтехсаноат» уюшмасига ташриф буюрди.

Хусусан, Хитойнинг электроника, энергетика, автомобилсозлик, ахборот технологиялари каби йўналишларда фаолият юритувчи а10 дан ортиқ компаниялар вкиллари делегация таркибида иштирок этди.

Ташриф доирасида уюшма раиси Мирзиёд Юнусов билан музокаралар ўтказилди. Учрашувда икки томонлама ҳамкорликни янада кенгайтириш, янги лойиҳаларни амалга ошириш, технологик трансферни жадаллаштириш, инвестиция жалб қилиш, экспорт салоҳиятини ошириш ҳамда мутахассислар ўртасида тажриба алмашиш масалалари муҳокама қилинди.

Хитой делегацияси Ўзбекистоннинг саноат салоҳияти, электроника соҳасидаги жадал ўсиш суръатлари ва хорижий ҳамкорликка очиқлигини юксак баҳолади. Томонлар амалий лойиҳаларни қўллаб-қувватлаш ҳамда истиқболли йўналишларда ишчи гуруҳлар ташкил этиш ташаббусини илгари сурдилар.

Делегация ташрифи доирасида Хитой компаниялари вакиллари маҳаллий электротехника саноати корхоналарига ташриф буюриб, ишлаб чиқариш жараёнлари билан яқиндан танишишлари режалаштирилган.

Мазкур ташриф Ўзбекистон ва Хитой ўртасида стратегик ҳамкорликни мустаҳкамлаш ҳамда мамлакатимизнинг глобал электроника занжирига интеграциясини жадаллаштиришга хизмат қилади.