Тошкент, Ўзбекистон (UzDaily.uz) — Туркиянинг биринчи хоними Эмине Эрдоған АҚШ президентининг турмуш ўртоғи Мелания Трампга мурожаат йўллаб, уни Украинадаги урушга нисбатан кўрсатган ҳамдардлиги каби, Ғазо секторидаги гуманитар фожиага ҳам эътибор қаратишга чақирди. Бу ҳақда Туркия президенти маъмурияти матбуот хизмати хабар берди.

Хатда Эмине Эрдоған Мелания Трампга миннатдорлик изҳор этди ҳамда уларнинг олти йил олдин Оқ уйда бўлиб ўтган самимий учрашувини эслаб ўтди. У АҚШнинг биринчи хоними Украинадаги низодан жабр кўрган болалар тақдирига кўрсатган эътибори умид уйғотганини қайд этиб, шундай ҳамдардликни фаластинлик болаларга ҳам кўрсатишга даъват этди.

«Украин болалари юзига табассум қайтаришга қаратилган саъй-ҳаракатларингиз катта аҳамиятга эга. Ишончим комилки, сиз Ғазо болаларининг тақдирига ҳам шундай чуқур эътибор қаратасиз. Бу ерда икки йил ичида ўн минглаб тинч аҳоли, жумладан минглаб болалар ҳалок бўлди», — деб ёзди Эмине Эрдоған.

Туркиянинг биринчи хоними таъкидлашича, Ғазодаги вазият замонавий тарихдаги энг оғир гуманитар инқирозлардан бирига айланди. Унинг сўзларига кўра, «ҳар 45 дақиқада бир бола ҳалок бўлмоқда», минглаб чақалоқлар эса ҳали ҳам шахси аниқланмаган қурбонлар қаторида қолмоқда. Бу эса «инсоният виждонига битмас-туганмас яра солмоқда».

Эмине Эрдоған АҚШ президентининг турмуш ўртоғини Исроил бош вазири Биньямин Нетаньяхуга мурожаат қилиб, Ғазо секторидаги гуманитар фожиани тўхтатишни қатъият билан талаб қилишга чорлади.

У қайд этдики, Фаластин болалари ҳам Украина болалари каби хурсандчиликка, эркинликка ва муносиб келажакка ҳақлидир.

«Агар сизнинг овозингиз Ғазони ҳимоя қилиш учун янграса, бу жуда катта аҳамият касб этар эди. Бу фаластин халқи олдидаги тарихий масъулиятни бажариш бўларди», — деб таъкидлади у.

Хулоса қилиб, Эмине Эрдоған болаларни ҳимоя қилиш ва халқаро ҳуқуққа амал қилиш — бу умуминсоний бурч эканини, фақатгина саъй-ҳаракатларни бирлаштириш орқали келажак авлодларга умид қайтариш мумкинлигини қайд этди.