Тошкент, Ўзбекистон (UzDaily.uz) —Тошкент шаҳарлараро иқтисодий суди Яккасарой туманида олиб борилаётган қурилиш ишларини тўхтатиш тўғрисида қарор қабул қилди.

Бундай қарор қабул қилинишига Ўзбекистон Маданий мерос агентлигининг таклифи асосида Маданият ва санъатни ривожлантириш жамғармаси томонидан берилган мурожаат сабаб бўлди. Қонунбузарликлар билан олиб борилаётган қурилиш ишлари Ўзбекистон Амалий санъат музейига — Тошкент модернизмининг ёрқин намунаси ва маданий мерос объектига зарар етказиши мумкин эди.

Ўзбекистон Амалий санъат музейи нафақат бебаҳо бадиий анъаналарни сақлайдиган марказ, балки Тошкентнинг тарихий ва маданий юзини акс эттирадиган архитектура етуклигининг бир қисми ҳисобланади. Бундай объектларни асраш мамлакатнинг тарихий меросини ҳимоя қилишда муҳим аҳамият касб этади.

Суд томонидан ўрганилган ҳужжатларга асосан, қурилиш ишлари белгиланган тартиб-қоидаларга зид равишда амалга оширилаётгани аниқланди. Уларнинг давом этиши маданий мерос объектига тузатиб бўлмайдиган зарар етказиши мумкин эди. Шу сабабли суд қурилиш ишларини зудлик билан тўхтатиш, ноқонуний қурилган иншоотларни демонтаж қилиш ва ҳудудни аввалги ҳолатига келтириш ҳақида қарор чиқарди.

Ўзбекистон Маданият ва санъатни ривожлантириш жамғармаси Тошкентнинг тарихий муҳитини сақлаш муҳимлигини таъкидлаб, маданий ва тарихий аҳамиятга эга ҳудудларда қурилиш лойиҳаларини амалга оширишда қонунчилик талабларига қатъий риоя қилишга чақирмоқда.

Суднинг мазкур қарори шаҳарнинг архитектура меросини ҳимоя қилиш борасидаги муҳим қадамлардан бири бўлиб, шаҳарсозлик фаолиятига масъулият билан ёндашиш зарурлигини яна бир бор эслатиб ўтди.

Маданий меросни сақлаш — фақатгина тарихий масала эмас, балки келажак авлодлар олдидаги масъулиятдир.