Тошкент, Ўзбекистон (UzDaily.uz) — Тошкент шаҳрида икки йўловчи автобуси иштирокида йўл-транспорт ҳодисаси содир бўлиб, натижада бир киши жабрланди.

«Тошшаҳартрансхизмат» АЖ матбуот хизмати маълумотига кўра, ҳодиса 22 август куни тахминан соат 14:45 да пойтахтнинг Яккасарой туманидаги Мукими кўчасида содир бўлган. №18 йўналишида ҳаракатланган ва 5-автобус паркка бириктирилган Yutong русумли автобус олдидан ҳаракатланаётган худди шу турдаги бошқа автобус билан тўқнашган.

Транспорт воситаси рулда 25 йиллик тажрибага эга 51 ёшли ҳайдовчи Р.М. бўлган. Дастлабки маълумотларга кўра, ҳодиса натижасида биринчи автобус йўловчиси, 19 ёшли М.О., енгил жароҳат — пешонасида тирналиш олган ва тиббий ёрдамга мурожаат қилган.

Ҳар икки автобусга техник шикаст етган. Ҳозирда ЙТҲ бўйича текширув ишлари олиб борилмоқда.

Гувоҳларнинг сўзларига кўра, автоҳалокатда жабр корганлар сони расмий рақамлардан анча ошиб кетган.