Тошкент, Ўзбекистон (UzDaily.uz) — 23 май куни Транспорт вазирининг биринчи ўринбосари Маманбий Омаров Хитой Халқ Республикасининг Фуцзянь вилояти ҳокими Жао Лун бошчилигидаги делегация вакиллари билан учрашди.

Учрашувда томонлар транспорт, транзит ва логистика соҳасидаги ҳамкорлик алоқаларини ривожлантириш истиқболларини муҳокама этишди. 

Жао Лун жаноблари Фуцзянь вилояти ўзининг янги энергия, нефть-кимё, электрон ахборот, рақамли иқтисодиёт каби соҳалардаги саноат устунликларини тўлақонли ишга солган ҳолда Ўзбекистон билан савдо-иқтисодий, инвестиция ва илмий-техникавий инновациялар соҳасида ҳамкорликни кенгайтиришдан манфаатдор эканлигини алоҳида таъкидлаб ўтди.

Транспорт вазирининг биринчи ўринбосари Маманбий Омаров сўнгги йилларда мамлакатларимиз ўртасида ўзаро юк ташувларида ижобий динамика кузатилаётганини мамнуният билан эътироф этди. Хусусан,  Хитой билан халқаро юк ташиш ҳажми 2024 йил якунига кўра тарихий даража 6,0 млн  тоннага етган.

Шунингдек, Хитойлик ҳамкорлар билан биргаликда транспорт ва логистика соҳасида,  хусусан,  автомобиль ва темир йўллари,  аэропортлар,  транспорт-логистика марказлари қурилиши,  жамоат транспорти учун электробуслар харид қилиш бўйича салмоқли лойиҳалар амалга оширилаётгани таъкидлаб ўтилди.

Хусусан, “Тошкент – Фучжоу” йўналишида блок поезди қатновининг йўлга қўйилиши “Бир камар – бир йўл” ташаббусини сифат жиҳатидан янги босқичга олиб чиқиш учун янги имконият очиши қайд этиб ўтилди.

Шундан сўнг томонлар “Тошкент – Фучжоу” йўналишда биринчи блок поездини жўнатишга бағишланган тантанали маросимда иштирок этишди.

Ушбу йўналиш Марказий Осиёдан Хитойнинг жануби-шарқий соҳилигача бўлган ҳудудлар ва денгиз йўналишини боғлайди. У қуруқликдаги Ипак йўли билан денгиздаги Ипак йўлини ўзаро уйғунлаштирувчи икки томонлама алоқа тармоғини вужудга келтириши билан аҳамиятлидир.

Ушбу қатнов Хитой ва Ўзбекистон ўртасидаги логистика соҳасида ўзаро боғлиқлик ва ҳамкорликни янги босқичга олиб чиқишда тарихий аҳамиятга эга воқеликдир.

– “Тошкент - Фучжоу” йўналиши бўйича биринчи блок поездини жўнатиш маросими Ўзбекистон ва Хитой Халқ Республикаси ўртасидаги транспорт алоқаларини мустаҳкамлаш борасидаги биргаликдаги саъй-ҳаракатларимизнинг ёрқин намунаси. Ўзбекистонлик ишлаб чиқарувчилар маҳсулотлари солинган 50 та контейнердан иборат поезд Ўзбекистоннинг экспорт салоҳияти юксалиб бораётганининг рамзи ва янги логистика йўналишининг амалда йўлга қўйилганидан далолат беради, - деди М.Омаров.