Сенат Раиси бошчилигидаги Ўзбекистон делегацияси Беларусь Республикасига ташриф буюрди

Тошкент, Ўзбекистон (UzDaily.uz) — 2 сентябрь куни Ўзбекистон Республикаси Олий Мажлиси Сенати Раиси Танзила Нарбаева бошчилигидаги делегация Беларусь Республикаси Витебск шаҳрига расмий ташриф билан келди. 

Ташриф доирасида Олий Мажлис Сенати Раиси Танзила Нарбаеванинг Беларусь Республикаси Миллий мажлиси Республика Кенгаши Раиси Наталья Кочанова билан учрашуви ўтказилади.

Шунингдек, ташриф давомида қатор муҳим тадбирлар ташкил этилади. Жумладан, Ўзбекистон Республикаси Олий Мажлиси Сенати ва Беларусь Республикаси Миллий мажлиси Республика Кенгаши ўртасида ҳамкорлик бўйича комиссиянинг илк мажлиси ва “Ўзбекистон – Беларусь: ҳамкорлик барқарор ривожланиш омили сифатида” мавзусида Ўзбекистон ва Беларусь тадбиркор аёлларининг учинчи бизнес-форум ялпи мажлиси бўлиб ўтади. 

Ўзбекистон ва Беларусь тадбиркор аёлларининг учинчи бизнес-форуми доирасида еттита секция ташкил этилади, уларда форум иштирокчилари саноат ва ижтимоий-иқтисодий соҳадаги ҳамкорликдан тортиб маҳаллий вакиллик органлари ва ёшлар ҳамкорлигигача бўлган кенг кўламли масалаларни муҳокама қиладилар. 

Ташриф доирасида яна бир муҳим тадбир – Витебск шаҳрида ташкил этиладиган “Made in Uzbekistan” миллий кўргазмасидир. Унда озиқ-овқат, фармацевтика, енгил саноат, туризм, ҳунармандчилик ва электрон техника каби соҳаларда фаолият юритаётган 70 дан зиёд тадбиркор аёллар ўз маҳсулот ва хизматларини намойиш этадилар.