Тошкент, Ўзбекистон (UzDaily.uz) — Наманган вилояти ИИБ ЙҲХБ матбуот хизмати хабарига кўра, Қамчиқ довонида бир сутка ичида юк автомобиллари иштирокида икки йирик йўл-транспорт ҳодисаси содир бўлиб, уч киши ҳаётдан кўз юмди.

Биринчи бахтсиз ҳодиса 28 август куни соат 04:40 да А-373 трассасида рўй берган. “Lacetti” автомобили бир йўналишда ҳаракатланаётган юк машинаси билан тўқнашган. Йўловчилардан бири ҳодиса жойида ҳалок бўлган, яна бир жабрланувчи шифохонага етказилган.

Иккинчи ҳодиса шу ҳудудда соат 08:39 да содир бўлган. “Cobalt” автомобили ҳайдовчиси бошқарувни йўқотиб, ўнг қатнов йўлагидан ҳаракатланаётган юк машинасига бориб урилган, сўнг яна бир юк автомобили билан тўқнашган. Натижада енгил машинадаги икки йўловчи олган жароҳатлари сабабли ҳалок бўлган.

Ҳар икки ҳолат юзасидан Пап тумани ИИБ ТЕРБ тергов бўлими томонидан Жиноят кодексининг 266-моддаси 2-қисми асосида жиноят иши қўзғатилди. Тергов ишлари олиб борилмоқда.