Тошкент, Ўзбекистон (UzDaily.uz) — Португалия терма жамоасининг собиқ бош мураббийи Паулу Бенту Ўзбекистон миллий жамоаси бош мураббийи лавозими учун номзод сифатида кўриб чиқилмоқда, дея хабар бермоқда «Чемпионат Азия» нашри.

56 ёшли мутахассис клуб ва терма жамоа футболида катта тажрибага эга. Турли йилларда у «Спортинг», «Крузейро», «Олимпиакос» ва «Чунцин Лифан» жамоаларини бошқарган. Терма жамоалар даражасида эса Бенту 2010–2014 йилларда Португалия, 2018–2022 йилларда Жанубий Корея терма жамоаларини бошқарган, 2023–2025 йилларда эса БАА миллий жамоаси билан ишлаган.

Бундан аввал Ўзбекистон футбол ассоциацияси Туркия терма жамоасининг собиқ бош мураббийи Фатих Теримга таклиф йўллагани, ундан олдин эса Йоахим Лёв таклифни рад этгани хабар қилинган эди. Энди эса бош мураббий лавозими учун бир нечта номдор мутахассис асосий даъвогарлар қаторида кўриб чиқилмоқда.