Тошкент, Ўзбекистон (UzDaily.uz) — Ўзбекистоннинг Истанбулдаги Бош консулхонаси Туркия ва Ўзбекистон ўртасидаги авиақатновлар давомида бегона юкни олишдан эҳтиёт бўлишни фуқароларга тавсия этди.

Дипломатик миссия маълумотларига кўра, айрим шахслар аэропортларда турли баҳоналар билан юкни етказиб беришни сўрашлари мумкин. Улар оғир касаллиги бор қариндоши ёки бошқа сабабларни баҳона қилиб, юкни бошқа йўл билан юбориш имконияти йўқлигини айтиши мумкин.

«Бироқ, бундай ваъдаларга ишонманг ва бегона юкни ҳеч қандай ҳолатда қабул қилманг!» — дейилади Бош консулхона баёнотида.

Дипломатик идора маълумотларига кўра, сўнгги йилларда бир нечта ўзбекистонлик фуқаролар бехабар ҳолда ноқонуний юкларни, жумладан, наркотик моддалар ва сохта ҳужжатларни ташиш учун қўлланилган.

Масалан:2023 йил – Истанбул аэропортида 27 ёшли Ўзбекистон фуқароси номаълум шахснинг илтимосига биноан юкни олиб ўтишга рози бўлди. Бироқ, чегарада текширув вақтида юк ичидан катта миқдорда наркотик моддалар топилди. Натижада, у 10 йиллик қамоқ жазосига ҳукм қилинди. 2022 йил – Анталия шаҳридан Тошкентга қайтаётган яна бир фуқаро ўзига нотаниш кишининг юкини олиб ўтишга рози бўлди. Юк таркибида сохта паспорт ва ноқонуний ҳужжатлар борлиги аниқланиб, фуқаро бир неча йилга озодликдан маҳрум этилди.

«Ҳатто инсон оғир сабабларни кўрсатса ҳам, ҳеч қачон бегона юкни олманг!» — деб огоҳлантирди Бош консулхона.

Дипломатлар фуқароларни оғох бўлишга, эҳтиёт чораларини кўришга ва шубҳали илтимосларга алданмасликка чақирди. Ҳушёрлик ва эҳтиёткорлик жиноий оқибатлардан сақланишнинг энг муҳим йўли эканини таъкидлашди.