Тошкент, Ўзбекистон (UzDaily.uz) — Ўзбекистон Президенти Шавкат Мирзиёев 20 август куни тадбиркорлар билан учрашув чоғида капитал жалб қилишни соддалаштириш ва компанияларга инвесторлар билан тўғридан-тўғри ишлаш имконини беришга қаратилган янги инвестиция платформаси яратилишини эълон қилди.

Давлат раҳбари таъкидлашича, амалдаги меъёрларга кўра, инвесторнинг лойиҳага қатнашиши учун уни масъулияти чекланган жамиятнинг таъсисчилари таркибига киритилиши талаб этилади. Бундай схема кўпчиликка мақбул келмайди ва натижада бизнесни молиялаштиришнинг асосий юки банклар зиммасига тушишда давом этмоқда.

Янги инвестиция платформаси эса вазиятни ўзгартириши керак. Энди компаниялар унда ўз лойиҳаларини тақдим этиши, инвесторлар эса сармоя киритиш учун энг жозибадор йўналишларни танлаши мумкин бўлади.

Президентнинг сўзларига кўра, ушбу инструмент тадбиркорларга ҳар йили қўшимча бир миллиард АҚШ долларигача инвестиция жалб этиш имконини беради.