Тошкент, Ўзбекистон (UzDaily.uz) — Ўзбекистонда Россиянинг тўққизта IT-компанияси иштирокида бизнес-миссия бўлиб ўтди.

Ташриф Россия Федерациясининг Ўзбекистондаги савдо ваколатхонаси кўмагида ташкил этилди.

Тадбир доирасида ўн икки учрашув ўтказилиб, россиялик мутахассислар республикадаги эҳтимолий ҳамкорлар билан ҳамкорлик истиқболларини муҳокама қилдилар.

Савдо ваколатхонаси матбуот хизмати маълумотига кўра, иштирокчилар ўз дастурий ечимларини тақдим этиб, профессионал тажриба билан ўртоқлашдилар ва халқаро бозорларда муваффақиятли амалга оширилган лойиҳалар ҳақида гапирдилар.

Ўзбекистонлик ҳамкорларда ходимлар самарадорлигини мониторинг қилиш, муҳандислик дастурий таъминоти ҳамда электрон тижорат учун IT-ечимлар бўйича ишланмалар алоҳида қизиқиш уйғотди.

Бизнес-миссиянинг асосий натижаларидан бири Россиянинг дастурий таъминот ишлаб чиқувчиларининг нотижорат ҳамкорлиги («НП РУССОФТ») ва Ўзбекистон IT-парки ўртасида ҳамкорлик тўғрисидаги келишувнинг имзоланиши бўлди.

Ҳужжат икки давлат IT-компаниялари ўртасида ҳамкорликни мустаҳкамлаш, қўшма корхоналар ташкил этиш ва ахборот технологиялари ҳамда бизнес-хизматлар соҳасида лойиҳаларни амалга оширишни кўзда тутади.