Тошкент, Ўзбекистон (UzDaily.uz) — 2025 йил 1 июлдан бошлаб Ўзбекистонда ички авиарейсларга рўйхатдан ўтиш тартиби соддалаштирилади. Вазирлар Маҳкамасининг янги қарорига мувофиқ, эндиликда йўловчилар шахсини тасдиқлаш учун электрон шахсий гувоҳномани тақдим этиш орқали рўйхатдан ўтишлари мумкин бўлади.

Аэропортда рўйхатдан ўтишдан олдин йўловчи my.gov.uz порталидаги шахсий кабинети ёки «Ижтимоий карта» мобил иловасига кириши лозим. У ерда шахсий маълумотлар саҳифасида амалдаги шахсий гувоҳнома (ID-карта) акс этган бўлиб, шу электрон шаклни йўловчи рўйхатдан ўтиш шохобчасида ходимга намойиш этади.

Фақатгина my.gov.uz ёки «Ижтимоий карта» иловаси орқали тақдим этилган расмий электрон ҳужжатлар қабул қилинади.

Қуйидагилар қабул қилинмайди:

ҳужжатларнинг нусхалари,

паспорт ёки ID-картанинг фотосуратлари,

сканер қилинган тасвирлар,

шахсий маълумотлар саҳифасининг скриншотлари.

Яъни, ички рейсларга рўйхатдан ўтишда фақат расмий рақамли манбалардан (my.gov.uz ва «Ижтимоий карта») олинган маълумотлар ҳақиқий шахсни тасдиқловчи ҳужжат сифатида қабул қилинади.