Тошкент, Ўзбекистон (UzDaily.uz) — Жорий йил 27 август куни Ўзбекистон Савдо-саноат палатасида Хитой Халқ Республикасининг Хитой Халқ Республикаси Шинжон-Уйғур автоном райони Или-Қозоқ автоном вилояти делегацияси билан учрашув бўлиб ўтди. Унда Палата раиси ўринбосари Дилшод Расулов ва Хитой делегацияси раҳбари Чжан Цзиньпин иштирок этди.

Суҳбат чоғида икки томонлама ҳамкорликни янги босқичга олиб чиқиш масалалари муҳокама қилинди. Хусусан, қишлоқ хўжалиги ва аграр маҳсулотларни қайта ишлаш, ичимликлар ишлаб чиқариш, ҳисоблаш техникаси ва юқори технологиялар, тоғ-металлургия саноати, халқаро кўргазмалар ва бизнес форумлар ташкил этиш каби соҳаларда қўшма лойиҳаларни йўлга қўйишга алоҳида эътибор қаратилди.

Шунингдек, иқтисодиёт, савдо, инвестиция ва маданий-гуманитар алоқаларни мустаҳкамлаш масалалари ҳам муҳокама этилди. Учрашувда томонлар ҳамкорликнинг стратегик аҳамиятини таъкидлаб, икки мамлакат тадбиркорлари учун янгидан-янги имкониятлар яратишга тайёр эканликларини билдирдилар.

Музокаралар якунида ҳамкорликка оид меморандум имзоланди. Ушбу ҳужжат савдо-иқтисодий муносабатларни чуқурлаштириш, саноат ва қишлоқ хўжалиги соҳаларида қўшма корхоналар ташкил этиш, инновацион технологиялар алмашинувини йўлга қўйиш ва тадбиркорлар учун қулай муҳит яратишни назарда тутади.

Шу билан бирга, ушбу келишув Ўзбекистон иқтисодиётининг диверсификацияси, экспорт салоҳиятининг ошиши ва хорижий инвестицияларни жалб этишда ҳам катта аҳамият касб этади.