Тошкент, Ўзбекистон (UzDaily.uz) — Ўзбекистон ва Туркманистон тўғридан-тўғри авиақатновларни қайта йўлга қўйишга келишди. Бу ҳақда транспорт вазири Илҳом Махкамов Туркманистонда бўлиб ўтган юқори даражадаги уч томонлама учрашув якунлари бўйича «O’zbekiston 24» телеканалига берган интервьюсида маълум қилди.

«Ҳозирги пайтда Ўзбекистондан Туркманистонга тўғридан-тўғри рейслар мавжуд эмас. Бугун биз тегишли ҳужжатни имзоладик ва яқин вақтларда мамлакатларимиз ўртасида мунтазам авиақатновларни йўлга қўйиш имконияти пайдо бўлади», — дея таъкидлади вазир.

Аваза шаҳрида бўлиб ўтган Туркманистон, Озарбайжон ва Ўзбекистон етакчилари учрашуви якунлари бўйича Ўзбекистон Транспорт вазирлиги ҳамда Туркманистонни Довран Сабуров бошқариб келаётган давлат «Туркменховаёллари» (Turkmenistan Airlines) хизмати ўртасида фуқаро авиацияси соҳасида ҳамкорликни ривожлантириш ҳақида қўшма протокол имзоланди.