Тошкент, Ўзбекистон (UzDaily.uz) — Ўзбекистоннинг Туркиядаги элчихонаси ва "Arikan Group" компанияси ҳамкорлигида "Kipaş Holding", "Molcem Nano", "Elif Iplik" каби етакчи тўқимачилик компаниялари вакиллари билан давра суҳбати бўлиб ўтди.

Тадбир 2025 йил 21 август куни Туркиянинг Қаҳраманмараş вилоятида Туркия ва Ўзбекистон ўртасидаги савдо-иқтисодий ва инвестициявий ҳамкорликни кенгайтиришга қаратилган бўлиб, унда икки давлат корхоналари ўртасидаги мавжуд ҳамкорлик, янги инвестиция лойиҳалари ва бозор имкониятлари муҳокама қилинди.

"Molcem Nano" компанияси ишлаб чиқаришининг бир қисмини Чирчиқ технопаркига кўчиргани, "Elif Iplik" эса Ўзбекистонга экспорт ва қўшма лойиҳаларга қизиқиш билдираётгани таъкидланди.

"Arikan Group" билан Ўзбекистонда қўшма ишлаб чиқариш, R&D фаолияти ва Туркияда маркетинг офисларини очиш режалаштирилмоқда. Шунингдек, Тошкент тўқимачилик университети билан миллий либослар дизайнига бағишланган биеннале ўтказиш бўйича келишувга эришилди.

Турк компаниялари 2025 йил 9–11 сентябрь кунлари бўлиб ўтадиган «TextileExpo» кўргазмасида иштирок этиш учун Ўзбекистонга бизнес-миссия билан ташриф буюради. Ҳамкорлик ишлаб чиқариш, инновация ва маданий алмашинув соҳаларини ўз ичига олади.