Тошкент, Ўзбекистон (UzDaily.uz) — Ўзбекистон Савдо-саноат палатаси раиси ўринбосари А.Тўхтаев бошчилигидаги делегациянинг Карачи шаҳрига ташрифи доирасида Покистоннинг етакчи тўқимачилик компаниялари — Artistic Textile ва Diners Textile билан муҳим учрашув ва музокаралар бўлиб ўтди.

Дунёдаги йирик джинс мато ва кийим ишлаб чиқарувчиларидан бири саналган Artistic Textile раҳбарияти Ўзбекистонда йирик инвестицион лойиҳа амалга оширишга қизиқиш билдирди.

Компания 18 та завод, 25 минг ходим ва 50 минг гектар ерга эга бўлиб, йилига 450 млн долларлик маҳсулот – 80 млн кв.м джинс мато ва 30 млн дона тайёр кийим ишлаб чиқаради. Компания асосий экспорт йўналишлари АҚШ ва Европа мамлакатларидир, ва машҳур брендлар (Levi’s, GAP, Target, Zara, H&M, Ralph Lauren, HUGO BOSS) билан ҳамкорлик қилади.

Artistic Textile Ўзбекистондаги инвестиция муҳити, малакали кадрлар ва ресурслар салоҳиятини юқори баҳолади.

Эркак кийими ишлаб чиқарувчи Diners Textile компанияси йилига 1 млн дона кийим ишлаб чиқаради, 6 минг нафар ходим фаолияти билан Покистон ва БААда савдо нуқталарига эга.

Компания раҳбарияти Ўзбекистонда тайёр кийим ишлаб чиқариш ва маҳсулотларни экспортга йўналтириш бўйича тўғридан-тўғри инвестиция киритиш таклифини қўллаб-қувватлади.

Карачидаги учрашувлар Ўзбекистон тўқимачилик саноатини замонавий технологиялар, экспортни диверсификация қилиш ва янги сармоялар билан ривожлантириш имкониятини оширди.