Тошкент, Ўзбекистон (UzDaily.uz) — Ўзбекистон Соғлиқни сақлаш вазирлиги делегациясининг Корея Республикасига ташрифи ўзаро ҳамкорлик истиқболига доир манфаатли келишувларга бой бўлди.

Дастлаб вакилларимиз вазирликнинг Фан-таълим ва инновациялар бошқармаси бошлиғи У.Исмаилов бошчилигида Сеул миллий университетининг Бунданг клиникасига ташриф буюрди.

Бу ерда шифохона раҳбарияти билан ўтказилган мулоқотда қайд этилганидек, мазкур нуфузли клиника 2300 ўринга эга. Кунига 8500 нафар беморга амбулатор ёрдам кўрсатилади, 180 та жарроҳлик амалиёти бажарилади.

Муассаса кам инвазив усулдаги операцияларни ўтказишга мўлжалланган 4 та сўнгги авлод DaVinci робот технологияси, замонавий лабораториялар, виртуал симуляторлар, телемедицина маркази, 3D-тренинг залларига эга.

Учрашувда ўзаро тажриба амашиш, шифокор ва ҳамширалар, тиббий техника муҳандислари тайёрлаш, робототехника, онкология, рақамлаштириш, телетиббиёт, онкология каби соҳаларда ҳамкорлик қилиш, маҳорат дарслари ўтказиш каби масалалар юзасидан келишувга эришилди.

Навбатдаги манзил — Кёнджу университети бўлди. Бу ерда ташкил этилган халқаро анжуманда Республика ихтисослаштирилган эндокринология илмий-амалий тиббиёт маркази директори А.Алимов ва бошқалар маъруза қилди.

Шундан сўнг меҳмонлар Кёнджу университети ва ҳамширалар тайёрлаш коллежи фаолияти билан танишди. Юртимизда қўшма таълим дастурларини йўлга қўйиш имкониятлари ҳам кўриб чиқилди.

Ўз навбатида, Чангвон давлат университети ва Asantek илмий гуруҳи билан учрашув ташкил этилди.

Индже университети клиникаси, Ёнсей университетининг биотехнология ва нанотехнология бўлими фаолияти, SD-biosensor компаниясининг экспресс-диагностика ускуналари билан танишув жараёнлари ҳам қизғин кечди.

Шунингдек, Heuron илмий гуруҳи томонидан ташкил этилган семинарда инсультни эрта аниқлаш ва шошилинч тиббий ёрдам хизматларини рақамлаштириш орқали ўлим ҳамда ногиронлик даражасини камайтириш технологияси тақдимоти ўтказилди. Якунда ўзаро ҳамкорлик истиқболлари муҳокама этилди.

Корея халқаро соғлиқни сақлаш жамғармаси (KOFIH) президенти билан бўлиб ўтган учрашувда ўзаро ҳамкорликни янада мустаҳкамлаш хусусида сўз борди.

Шифокор ва ҳамшираларимизнинг Жанубий Кореядаги етакчи университет клиникаларида малака ошириши, шошилинч ва тез ёрдам тизими учун мутахассисларни ўқитиш, юртимиздаги тиббиёт муассасаларини илғор технологиялар билан таъминлашга доир таклифлар кўриб чиқилди.

Натижада жамғарма кўмагида йилига 20 нафар ўзбекистонлик мутахассисларни халқаро стандартлар асосида бепул тайёрлаш бўйича келишувга эришилди.

Мулоқот якунида Корея томони соҳада ўзаро алоқаларни ривожлантиришга йўналтирилган 2026–2028 йилларга мўлжалланган ҳамкорлик дастурини кенгайтиришга тайёр эканлигини маълум қилди.