Тошкент, Ўзбекистон (UzDaily.uz) — 13–14 июль кунлари Ўзбекистон инвестициялар, саноат ва савдо вазири Лазиз Кудратов Болгарияда бўлди. Ташриф доирасида Президент Румен Радев, Бош вазир ўринбосари — транспорт вазири Гроздан Караджов, тегишли вазирликлар раҳбарлари, етакчи компаниялар ва молиявий институтлар вакиллари билан музокаралар ўтказилди.

Музокаралар марказида — Болгария Президентининг июнь ойида Тошкентга қилган ташрифи давомида эришилган келишувларни амалга ошириш масаласи бўлди. Геология, логистика, қурилиш, энергетика, рақамли трансформация, экология ва агро-саноат комплекси каби устувор йўналишларда қўшма лойиҳаларни ишга туширишга томонлар ўзаро тайёрликларини билдиришди.

Учрашувлар давомида транспорт боғлиқлигини ривожлантириш ва саноат кооперацияси масалаларига алоҳида эътибор қаратилди. Амалий жиҳатдан муҳим қадам сифатида октябрь ойида Тошкентда Ҳукуматлараро комиссиянинг олтинчи йиғилиши ва бизнес-форум ўтказилиши режалаштирилмоқда. Барча ташаббуслар қўшма “Йўл харитаси”га киритилиб, тизимли назоратга олинади.