Ўзбекистон миллий терма жамоаси Панини оиласига қўшилди

Тошкент, Ўзбекистон (UzDaily.uz) — Ўзбекистон футбол ассоциацияси жаҳоннинг машҳур спорт коллекция бренди – Панини билан ҳамкорлик бўйича келишувга эришди. Тарихда илк бор Ўзбекистон миллий терма жамоаси Панинининг жаҳон миқёсида машҳур стикер альбомидан жой олади.

Италиянинг Панини компанияси бугунги кунда спорт коллекциялари, нашриёт ва савдо карточкалари соҳасида дунё етакчиси ҳисобланади. Компания 1970 йилдан бери ФИФА билан биргаликда Жаҳон чемпионатига бағишлаб футбол ихлосмандлари учун церийали коллекциялар тақдим этиб келмоқда. Бугунги кунда Панини ФИФА, УЭФА, НБА, НФЛ ҳамда дунёнинг етакчи футбол ассоциациялари ва клублари билан фаолият олиб боради.

“Бу ҳамкорлик Ўзбекистон футболи имиджини мустаҳкамлаш нуқтайи назаридан ҳам катта аҳамиятга эга. Панини расмий коллекциясидан жой олиш – юртимиз футболининг йиллар давомида босиб ўтган ривожланиш йўлига жуда мос эътирофдир. Бу бутун дунёга Ўзбек футболининг жаҳон миқёсида ўз ўрнини топиб бораётганлигини кўрсатади,” — деди ЎФА биринчи вице-президенти Равшан Ирматов.

Шуни алоҳида таъкидлаш керакки, Миллий жамоамиз Панини билан фаолият олиб борадиган Марказий Осиёдаги биринчи жамоага айланади. Йиллар давомида бутун дунё футбол ишқибозлари томонидан севиб йиғилган Панини альбоми эндиликда терма жамоамиз ва миллатимиз руҳини акс эттиради.