Тошкент, Ўзбекистон (UzDaily.uz) — Маҳаллий бизнес амалиётида илк бор, Ўзбекистон компанияси 140 йилдан ортиқ тарих, ҳамда 40 дан ортиқ мамлакатларда тан олинган, барқарор экспорт тармоғига эга бўлган халқаро брендни сотиб олди. Бу Ўзбекистон тўқимачилик соҳасида муҳим воқеа бўлиб, халқаро бозорга чиқаётган маҳаллий ишлаб чиқаришни ривожлантириш йўлида катта қадам ҳисобланади.

Бухоро вилоятида жойлашган “Kamalak Shabnam Teks” МЧЖ Ўзбекистон ҳудудида йирик инвестиция лойиҳасини амалга оширмоқда. Лойиҳа доирасида автомобилсозлик, мудофаа саноати, авиация, тиббиёт ва маиший эҳтиёжлар учун мўлжалланган полиестер ва полиамид асосида юқори сифатли техник ва уй тўқимачилиги маҳсулотларини ишлаб чиқариш режалаштирилган.

Лойиҳанинг муҳим жиҳати — Германиянинг Curt Bauer компанияси активларини тўлиқ Ўзбекистон Республикасига кўчириб келиниши ҳисобланади. Шу тариқа, “Kamalak Shabnam Teks” компанияси Ўзбекистон ҳудудида Curt Bauer брендига бўлган эксклюзив мулк ҳуқуқини қўлга киритди.

Лойиҳа нафақат 785 та янги иш ўрни яратилишига, балки Германия тўқимачилик саноатининг муҳим технологик «ноу-хау»га асосланган муҳандислик ёндашувларини Ўзбекистонга олиб киришга хизмат қилади. Бу мамлакатнинг ишлаб чиқариш салоҳиятини мустаҳкамлаш ва жаҳон бозорларида экспорт салоҳиятини кенгайтириш йўлида муҳим қадам бўлади.

Лойиҳа Ўзбекистоннинг хом ашёни қайта ишлашнинг юқори технологияли йўналишларини ривожлантириш, тўғридан-тўғри хорижий инвестицияларни жалб қилиш ва ҳудудларда барқарор иш ўринлари яратишга қаратилган стратегик мақсадларига тўлиқ мос келади.

Curt Bauer компанияси 1882 йилда Германиянинг Саксония минтақасида ташкил этилган бўлиб, премиум тоифадаги уй тўқимачилик маҳсулотлари – уй учун матолар, техник тўқимачилик ҳамда Ғарбий Африка учун махсус дамаск матоларини ишлаб чиқаришда кенг танилган. Унинг маҳсулотлари ноанъанавий дизайн, ишлаб чиқариш сифати ва юқори даражадаги тўқимачилик муҳандислиги билан ажралиб турган.