Тошкент, Ўзбекистон (UzDaily.uz) — АҚШ Black Hawk вертолётларининг бир қисмини қайтариб олди. Ушбу техника афғон учувчилари томонидан 2021 йил август ойида «Толибон» ҳаракати ҳужумлари вақтида Ўзбекистон ҳудудига олиб келинган эди. Бу ҳақда Вашингтондаги Ўзбекистон элчихонасида мамлакат Қуролли кучлари ташкил этилганининг 33 йиллигига бағишланган тадбирда маълум қилинди.

Маълумотларга кўра, Ўзбекистонда 46 та авиация техникаси (22 самолёт ва 24 вертолёт) бўлган. Уларнинг катта қисми республикага топширилган. Бироқ Пентагон томонидан яроқли деб топилган еттита Black Hawk вертолёти АҚШга қайтарилган.

АҚШ Мудофаа вазирлиги ёрдамчисининг вазифасини бажарувчи Дэвис Флорик Ўзбекистонга кўп йиллик ҳарбий-техник ҳамкорлик учун миннатдорчилик билдирди. У Тошкентнинг қўллаб-қувватлашини халқаро контингентнинг Афғонистондаги муваффақиятида ҳал қилувчи омил сифатида таъкидлади. Шунингдек, афғон қочқинларини эвакуация қилиш ва гуманитар конвойларни ташкил этишда ҳам Ўзбекистоннинг ҳиссаси катта бўлганини қайд этди.

Ўзбекистоннинг АҚШ ва Канададаги элчиси Фурқат Сидиқов Тошкент Вашингтон билан барча соҳаларда ҳамкорликни кенгайтиришга тайёр эканини таъкидлади. У икки давлат хавфсизлик тизимлари ва қуролли кучлари ўртасидаги алоқаларни юқори баҳолади.

2021 йил август ойида «Толибон» ҳокимиятни эгаллаган пайтда 500 дан ортиқ афғон ҳарбийлари АҚШ томонидан берилган самолёт ва вертолётларда Ўзбекистонга эвакуация қилинган эди. Вертолётлар қайтарилиши АҚШ ва Ўзбекистон ўртасидаги ҳамкорликни янада мустаҳкамлаш йўлидаги яна бир қадам бўлди.