Тошкент, Ўзбекистон (UzDaily.uz) — Бизнес-аутсорсинг (БПО) ва IТ-хизматлар соҳасидаги етакчи компаниялардан бири бўлган “Canaan Communication & Technologies” (Малайзия) делегацияси бошқа хорижий компанияларнинг инфратузилмаси, истеъдодлари ва муваффақиятли тажрибалари билан бевосита танишиш мақсадида Ўзбекистонга ташриф буюрди. Учрашувда бош директор Абдулаҳад Кучкаров бошчилигидаги IТ Park вакиллари иштирок этдилар.

“Canaan Communication & Technologies” — бош қароргоҳи Куала-Лумпур шаҳрида (Малайзия) жойлашган халқаро компаниядир. 2016 йилда ташкил этилган бу компания бизнес-аутсорсинг (БПО), IТ-хизматлар ва ходимларни ривожлантиришга ихтисослашган. Бугунги кунда “Санаан Соммунисатион” Малайзия, Цингапур ва Филиппинда фаолият юритмоқда, компанияда 500 дан ортиқ ходим меҳнат қилади.

“Canaan Communication & Technologies” “Zero Risk” дастурида иштирок этиш, Сирдарё вилоятида офис очиш ва Ўзбекистондан мутахассисларни ёллашга қизиқиш билдирди. Компания IТ соҳасидаги жозибадор солиқ имтиёзлари, “IT VISA” ва хорижий инвесторлар учун қулай шарт-шароитларни алоҳида таъкидлади.

Учрашув давомида томонлар Сирдарё вилоятининг мобил иловаларни ишлаб чиқиш бўйича хизматларни амалга ошириш маркази, шунингдек, алоқа маркази хизматларини аутсорсинг қилиш салоҳиятини муҳокама қилдилар.

“Canaan Communication” компаниясининг бизнесни ривожлантириш бўйича раҳбари Жиҳанг Ванг Заккари қуйидагиларни таъкидлади:

“Ўзбекистон юқори малакали кадрларга ва қулай ишбилармонлик муҳитига эга. Биз бу ерда мутахассислар тайёрлаш дастурларини ташкил этиш ва халқаро лойиҳалар учун мутахассисларни ёллаш имкониятини кўриб чиқмоқдамиз.”