Тошкент, Ўзбекистон (UzDaily.uz) — Мис фольгаси ишлаб чиқаришга ихтисослашган жанубий кореялик SK Nexilis компанияси энергия нархининг юқорилиги сабабли Ўзбекистонда корхона очиш имкониятини ўрганмоқда, деб хабар бермоқда Business Korea.

Нашр манбаларига кўра, компания Жонъип шаҳрида жойлашган ишлаб чиқаришни Ўзбекистонга кўчиришни режалаштирмоқда. Айни пайтда SK Nexilis’нинг Малайзияда бир нечта заводлари мавжуд. Мис фольгаси аккумуляторлар ишлаб чиқаришда қўлланилади.

Маълумотларга кўра, электр энергияси харажатлари фольга ишлаб чиқаришнинг таннархида 15 фоизгача улушга эга. Жанубий Кореяда 1 киловатт соат нархи 0,13 долларга етса, Ўзбекистонда бу кўрсаткич 0,08 долларни ташкил этади. Шунингдек, мамлакатда миснинг йирик захиралари ва уни қазиб олиш таннархи пастлиги қайд этилмоқда.

«Биз харажатлар рақобатбардошлигини таъминлаш мақсадида ишлаб чиқариш қувватларини хорижга кўчиришни ўз ичига олган турли вариантларни кўриб чиқмоқдамиз. Бироқ якуний қарор ҳали қабул қилинмаган», — дея изоҳ беришди SK Nexilis вакиллари.