Тошкент, Ўзбекистон (UzDaily.uz) — Туризм қўмитаси раиси Умид Шадиев Испаниянинг етакчи футбол клубларидан бири - "Атлетико Мадрид" раҳбарияти билан учрашув ўтказди.

“Атлетико Мадрид” футбол клубининг жаҳон миқёсидаги обрўси ва кенг қамровини ҳисобга олган ҳолда, Ўзбекистоннинг сайёҳлик салоҳиятини халқаро даражада тарғиб қилиш борасидаги ҳамкорлик истиқболлари муҳокама этилди. Бунинг натижасида Ўзбекистоннинг жозибадор сайёҳлик йўналиши сифатидаги танилишини ошириш, шунингдек, мамлакатнинг бой маданий ва тарихий меросини оммалаштиришга қаратилган қўшма реклама кампанияларини ташкил этиш кўзда тутилмоқда.

Ушбу учрашув Ўзбекистоннинг туризм салоҳиятини хорижий мамлакатларда янада тарғиб қилишда муҳим қадам бўлди, шунингдек, туризм соҳасида маркетинг стратегиясини амалга оширишнинг янги истиқболларини очади.