Энг сўнгги янгиликлардан хабардор бўлинг
Телеграм каналимизга обуна бўлинг
Ўзбекистон
03/08/2017
Ҳелен Фрейзер БМТнинг Ўзбекистондаги Резидент-координатори этиб тайинланди
Ҳелен Фрейзер БМТнинг Ўзбекистондаги Резидент-координатори этиб тайинланди
Тошкент, Ўзбекистон (UzDaily.uz) --
2017 йилнинг 3 август куни Ўзбекистон Республикаси Ташқи ишлар вазири Абдулазиз Камилов БМТ Резидент-координатори, БМТ Тараққиёт дастурининг Ўзбекистондаги Доимий вакили этиб тайинланган Ҳелен Фрейзерни қабул қилди. Бу ҳақда ЎзР ТИВ Матбуот хизмати хабар беради.
Ҳелен Фрейзер ўзининг Ўзбекистонга тайинлангани тўғрисидаги БМТ Бош котиби Антониу Гуттерришнинг мактубини Вазирга топширди.
Мулоқот давомида икки томонлама муносабатларнинг ҳолати ва уларни ривожлантириш истиқболлари муҳокама қилинди. Қайд этилганидек, БМТ Бош котиби Антониу Гуттерриш ҳамда БМТ Инсон ҳуқуқлари бўйича Олий комиссари Зайд Раад ал-Ҳусайннинг мамлакатимизга ташрифлари ҳамда уларнинг Президент Шавкат Мирзиёев билан самарали музокаралари БМТнинг Ўзбекистонга ва бутун Марказий Осиё минтақасига эътибори кучайганидан далолат беради.
Ҳозирги пайтда Ўзбекистон ва БМТни турли соҳалардаги унумли ҳамкорлик боғлаб турибди. Таъкидланганидек, асосий тамойил – инсон манфаатларининг ҳамма нарсадан устунлиги мамлакатимизда қабул қилинган 2017-2021 йилларда Ўзбекистонни ривожлантиришнинг бешта устувор йўналиши бўйича Ҳаракатлар стратегияси ва БМТ Бош Ассамблеяси томонидан тасдиқланган 2016-2030 йилларда Барқарор ривожлантириш мақсадларини бирлаштиради.
БМТ Ваколатхонасининг янги тайинланган раҳбарига 2017-2020 йилларда Ўзбекистон ва БМТ ўртасидаги ҳамкорликни янада ривожлантириш бўйича Дастур (“Йўл харитаси”) лойиҳаси кўриб чиқиш учун тақдим этилди ҳамда унинг асосий бандлари бўйича тушунтириш берилди.
Учрашувда айрим глобал ва минтақавий масалалар, жумладан БМТ шафелигида Ўзбекистонда бўлиб ўтадиган халқаро конференция кун тартиби юзасидан фикр алмашилди.
СЎНГИ ЯНГИЛИКЛАР