Тошкент, Ўзбекистон (UzDaily.uz) — 22 май куни Грузия Савдо-саноат палатаси президенти Георгий Пертая бошчилигидаги делегация Тошкент шаҳрида жойлашган “TEXNOPARK” МЧЖга ташриф буюрди. Ташриф доирасида меҳмонлар Ўзбекистондаги энг йирик саноат кластерларидан бири бўлган ушбу технопаркнинг фаолияти ва имкониятлари билан яқиндан танишиш имконига эга бўлдилар.

Грузия делегацияси аъзолари фаолият юритаётган корхоналарни кўздан кечирди, ишлаб чиқариш жараёнлари, технологик операцияларни автоматлаштириш даражаси ва экспорт салоҳияти билан яқиндан танишди. Шунингдек, улар маҳаллий ва хорижий компаниялар ўртасидаги ҳамкорлик, локализация жараёнлари ва ишлаб чиқаришда инновацион ечимларни жорий этиш масалаларига қизиқиш билдирдилар.

“TEXNOPARK” вакиллари меҳмонларга ишлаб чиқариш қувватлари, экспорт йўналишлари, хорижий ҳамкорлар (SAMSUNG, FERROLI) билан амалга оширилаётган қўшма лойиҳалар, шунингдек, экотизим ва ривожланиш учун яратилган қулай шароитлар ҳақида батафсил маълумот берди.

Ушбу ташриф Грузия ишбилармон доираларининг Ўзбекистондаги саноат ва технология секторига бўлган қизиқишини янада оширди ҳамда келгусидаги амалий ҳамкорлик учун мустаҳкам замин яратиши мумкин.