Тошкент, Ўзбекистон (UzDaily.uz) — Халқаро рейтинг агентлиги Fitch Ratings Ўзбекистондаги “SQB Insurance” суғурта компаниясининг молиявий барқарорлик рейтинги (IFS) ва эмитент дефолтининг узоқ муддатли рейтинги (IDR)ни ‘BB-’дан ‘BB’ даражасига оширди. Рейтинглар бўйича прогноз — «Барқарор».

Бу кўтарилиш компаниянинг ягона акциядори — Ўзбекистон саноат-қурилиш банки (Uzpromstroybank, UICB)нинг рейтинглари билан боғлиқ. Унинг ҳам узоқ муддатли рейтинги ‘BB’ даражасида қолмоқда, прогноз — “Барқарор”.

Fitch таъкидлашича, “SQB Insurance”нинг рейтинглари Uzpromstroybank билан боғлиқ ва мосдир, чунки суғурта компанияси банк учун стратегик аҳамиятга эга ҳисобланади. Уларнинг гуруҳдаги ўзаро интеграцияси юқори ва бошқарув назорати қўлланилган. Бу эса банк томонидан молиявий ва операцион қўллаб-қувватлаш давом этиши эҳтимоли юқорилигини кўрсатади.

Fitch агентлиги компаниянинг айрим индивидуал хусусиятларини ҳам таҳлил қилди:

2024 йил якунларига кўра бозордаги улуши 2,3% бўлгани сабабли фаолият кўлами нисбатан кичик;

Молиявий суғурта сегментидаги юқори концентрация;

Fitch Prism моделига кўра, 2023 йил охирида капиталлашув даражаси “кам” (Weak) деб баҳоланган.

Шу билан бирга, агентлик “SQB Insurance”нинг молиявий натижаларини ижобий баҳолади. Миллий ҳисобот маълумотларига кўра, 2024 йилда капитал рентабеллиги (ROE) 36% ни ташкил этди.

Компаниянинг инвестиция портфели деярли тўлиқ (99%) депозитлар ва омонатлардан иборат бўлиб, улар қисқа ва узоқ муддатли асосда жойлаштирилган. Ушбу маблағлар асосан давлат ва йирик хусусий банкларда сақланади, уларнинг рейтинглари ‘B’ ва ‘BB’ даражасида.