Тошкент, Ўзбекистон (UzDaily.uz) — Fitch Ratings ”Kapital Sug‘urta” АЖ суғурта компаниясининг молиявий барқарорлик рейтингини (IFS) “B” даражасидан «B-» даражасига туширди ва «Барқарор» прогнозини белгилади.

Рейтингнинг пасайтирилиши ”Kapital Sug‘urta” бизнесининг ошган таваккалчилиги, диверсификациянинг камайиши, капитализациянинг заифлашиши, молиявий кўрсаткичларнинг сустлиги ҳамда юқори инвестицион ва резерв хавфлари билан боғлиқ бўлди.

Агентлик компаниянинг бизнес хавф профили ёмонлашганини, бунга сабаб у молиявий таваккалчилик билан боғлиқ маҳсулотларга кўпроқ эътибор қаратаётганини қайд этди.

Хусусан, 2024 йилда тўловга лаёқатсизлик ёки банкротликдан ҳимоя қилувчи молиявий таваккалчилик суғуртаси улуши брутто мукофотларда 60% га, нето мукофотларда эса 52% га етди. Бу кўрсаткич 2022 йилда мос равишда 11% ва 12% ни ташкил этган эди.