Тошкент, Ўзбекистон (UzDaily.uz) -- Олий Мажлис Қонунчилик палатаси депутатлари “Ўзагротехсаноатхолдинг” АЖ тизимидаги корхоналарнинг ишлаб чиқариш, эксплуатация жараёнлари билан танишишди. Мақсад  соҳада амалга оширилаётган ишларни ўрганиш, камчилик ва муаммоларни аниқлаб бартараф этишдир.

Жамият вакиллари томонидан берилган маълумотга кўра, ўтган 2018 йилда “Ўзагротехсаноатхолдинг” тизим корхоналари томонидан жами 11 570 дона қишлоқ хўжалиги техникаси, жумладан, 3 817 та трактор, 477 дона тиркама каби техникалар ишлаб чиқрилган. Жорий йилнинг 20 январь ҳолати умумий қиймати 10,64 миллион АҚШ долларига тенг қишлоқ хўжалиги техникаси қўшни мамлакатларга экспорт ҳам қилинган. Депутатлар холдинг ҳудудидаги махсус кўргазмали майдонда жойлашган қишлоқ хўжалиги техникалари, агрегатлар ҳамда “Чирчиқ қишлоқ хўжалиги техникаси заводи” АЖ томонидан ишлаб чиқарилган қишлоқ хўжалиги техникалари билан ҳам яқиндан танишишди.

Шунингдек, парламент аъзолари учун “ЎзКлаасАгро” МЧЖ Ўзбекистон-Германия қўшма корхонаси иш фаолияти, қишлоқ хўжалиги техникаларини эксплуатацияси ва уларга сервис хизматларини кўрсатиш, ишлаб чиқариш жараёнида замонавий техника ва технологиялардан унумли фойдаланиш бўйича махсус тақдимот қилинди.