Ташкент, Узбекистан (UzDaily.uz) – Озарбайжон пойтахтида бокс бўйича “Буюк ипак йўли” номли халқаро мусобақа давом этмоқда. Турнирнинг иккинчи кун доирасида 3 нафар боксчимиз рингга кўтарилиб, уларнинг барчаси ғалаба қозонишди.

Ушбу кун доирасида янги вазн тоифасида иштирок этаётган Осиё ўйинлари ғолиби Иқболжон Холдоров (-69 кг), Шукуржон Раҳимов (-60 кг) ва Оқмурод Ғафоров (-75 кг) дастлабки рақибларини ортиқча қийинчиликсиз мағлуб этишди.

Шу тариқа, боксчиларимиз мусобақадаги мағлубиятсиз серияни давом эттиришмоқда. Бугун чорак финал баҳсларига старт берилиб, вакилларимиздан Жасурбек Латипов, Нодиржон Мирзааҳмедов (-49 кг), Алиёр Норалиев (-64 кг), Хуршид Абдуллаев, Дилшодбек Рўзметов (-81 кг), Мадияр Сайдраҳимов, Сардор Ёрмуҳаммедов (-91 кг), Обиджон Тохиров (+91 кг) ярим финал йўлланмаси учун рингга чиқишади.

Манба: Ўзбекистон миллий олимпия қўмитаси.