Тошкент, Ўзбекистон (UzDaily.uz) — БМТ биринчи марта Ғазо секторидаги ҳолатни офатли очлик деб расман эътироф этди. Бу ҳақда БМТнинг Озиқ-овқат ва қишлоқ хўжалиги ташкилоти (ФАО), Жаҳон озиқ-овқат дастури (ЖОД), ЮНИСЕФ ҳамда Жаҳон соғлиқни сақлаш ташкилоти (ЖССТ) қўшма баёнот берди.

Озиқ-овқат хавфсизлигини баҳолашнинг комплекс классификацияси (IPC)га кўра, вазият бешинчи, яъни энг юқори босқичга етган бўлиб, «офатли» даражадаги озиқ-овқат хавфсизлигига тўғри келади.

Айни пайтда Ғазода 500 мингдан ортиқ инсон қаттиқ очликдан азият чекмоқда, сентябр ойи охирига қадар улар сони 640 мингдан ошиб кетиши мумкин.

1,5 миллиондан зиёд аҳоли озиқ-овқат инқирози ёки фавқулодда ҳолатда қолмоқда, айниқса Ғазо шаҳри ва ҳудуднинг шимолий қисмида.

Болалар орасида очлик кескин кўпайгани қайд этилмоқда: фақат июл ойида 12 мингдан зиёд вояга етмаганлар оғир очликдан азият чекди, уларнинг чорак қисми оғир даражада.

Ҳомиладор ва эмизикли аёллар сони уч баробарга кўпайган бўлиб, улар жиддий хавф остида. Ҳар бешинчи чақалоқ муддатидан олдин ёки вазни етарсиз ҳолда туғилмоқда.

Офатли очликнинг асосий сабаблари сифатида уруш ҳаракатларининг давом этиши, Ғазо сектори блокадаси, гуманитар ёрдамнинг чекланганлиги ва қишлоқ хўжалиги инфратузилмасининг йўқ қилиниши кўрсатилмоқда. 22 ойдан бери давом этаётган можаро ушбу омилларни янада кучайтириб, бутун ҳудудда ҳаёт учун таҳдидли очликка олиб келди.

БМТ вакиллари таъкидлаганидек, фавқулодда оловни тўхтатиш ва гуманитар ёрдам киришидаги чекловларни бекор қилиш инсон ҳаётини сақлаб қолишнинг энг муҳим шартларидир.

«Очлик ҳар қандай нарса эвазига тўхтатилиши шарт», — дейилади баёнотда. БМТ Бош котиби Антониу Гутерриш Исроилнинг Ғазо шаҳрини эгаллаш операциясидан кейин фавқулодда оловни тўхтатишга чақирди ва узоққа чўзилган можаро гуманитар вазиятни янада оғирлаштираётганини, тинч аҳоли азият чекayotganини қайд этди.

Танқидларга жавобан Исроил БМТ ҳисоботини сохта ва ҲАМАС манфаатларига хизмат қилади, деб рад этди. Мамлакат Ташқи ишлар вазирлигига кўра, можаро бошлангандан бери Ғазога 100 мингдан зиёд гуманитар ёрдам юк машиналари кирган ва сўнгги ҳафталарда маҳаллий бозорларда озиқ-овқат нархлари пасайишига олиб келган.

Ғазо секторидаги вазият ҳали ҳам кескин бўлиб қолмоқда. Халқаро ҳамжамият янги қурбонларнинг олдини олиш учун шошилинч чоралар кўриш зарурати билан тўқнаш келмоқда. Оловни тўхтатиш ва гуманитар ёрдамнинг тўсиқсиз киришини таъминлаш аҳволни барқарорлаштириш ва тинч аҳолини ҳимоя қилишнинг энг устувор вазифаси бўлиб қолмоқда.