Жорий йилнинг 1-июль кунидан бошлаб банкоматларда конверсион карталардан нақд пул ечиб олишда ойига 300 АҚШ доллари миқдорида чеклов белгиланди.

“KDB Bank Uzbekistan”нинг хабарида айтилишича, мазкур чоралар конверсион карталардан фойдаланишда хавфсизликни таъминлаш мақсадида жорий этилди.

Банкнинг хабар беришича, Туркия, Хитой ва БААдаги улгуржи ва чакана савдо корхоналарида конверсион карталардан белгиланмаган тартибда фойдаланиш ҳолатлари учрамоқда.

Шунинг учун, номлари юқорида келтирилган мамлакатларда конверсион карталардан фойдаланишда чекловлар жорий этилди. Лекин шу билан бир вақтнинг ўзида, аввал бўлгани каби, меҳмонхонада яшаш, овқатланиш, даволаниш ва таълим олиш учун тўловларни амалга ошириш мумкин.