Тошкент, Ўзбекистон (UzDaily.uz) -- Тошкентдаги ИНҲА университетида “Ўзбекистон аёлларининг 100 та энг яхши инновацион лойиҳаси” II Республика танлови ғолибаларини тақдирлаш маросими бўлиб ўтди. Унда 4000 нафардан зиёд хотин - қизлар ўз ихтиролари, креатив ғоялари билан иштирок этишди.

Айтиш керак, мазкур танлов энг яхши ихтиро, энг яхши фойдали модел, энг яхши саноат намунаси ҳамда ҳунарманд аёлларнинг энг яхши инновацион лойиҳалари каби 10 та номинацияда ўтказилди. Унинг якуний босқичида, мамлакатимизнинг барча ҳудудларидан тавсия этилган 300 дан зиёд иштирокчиларнинг ҳужжатлари ва инновацион ғоялари Республика Экспертлар Кенгаши томонидан кўриб чиқилди.

Лойиҳалар ичидан 100 та энг муносиби  ва уларнинг муаллифлари-танловнинг ғолиблари сифатида танлаб олинди. Шунингдек, қатор номинацияларга лойиқ топилганларга ҳам хотин-қизлар қўмитасининг диплом ҳамда эсдалик совғалари топширилди. Аҳамиятли жихати, Республика Экспертлар Кенгаши томонидан танлаб олинган 100 га яқин лойиҳалар эндиликда амалиётга жорий этилади.