Ташкент, Узбекистан (UzDaily.uz) – Жаҳоннинг ўттизга яқин археолог – олимлари жорий йилнинг ёзда ўзларининг биринчи экспидицияларини мамлакатимизда ўтказишади. Бу ҳақда тадқиқотлар клуби яъни “Explorer’s Club”нинг 115 йиллик йиғилишида эълон қилинди. Унда Бош вазир ўринбосари Танзила Нарбаева бошчилигидаги делегация вакиллари ҳам иштирок этишди.

Мамлакатимизнинг АҚШдаги элчихонаси маълумотларига кўра, жаҳоннинг ўттизга яқин археолог – олимлари иштирок этадиган экспедициянинг мақсади Қорақалпоғистон ҳудудида кашф этилган, қадимий Хоразмнинг пойтахтларидан бири бўлган "Базар-қалъа" тарихий масканини ўрганишдир.

Айтиш керак, ушбу ишларни олиб боришга АҚШ томонидан тахминан 750 минг доллар сарфланмоқда. Тадқиқот учун эса НАСАнинг юқори аниқликдаги технологияларидан фойдаланилади. Унинг якунлари бўйича эса махсус ҳужжатли филм тайёрланиши ва уни жорий йилнинг октябр ойида бўлиб ўтадиган “Explorer’s Club” аъзоларининг кузги сессиясида намойиш этилиши режалаштирилмоқда.

Шу ўринда қўшимча қилиш лозим, Американинг мазкур клуби дунёнинг энг етук олимларини ўзида бирлаштирган энг қадимги илмий ташкилотдир. Унинг дастлабки йиғилиши ойга учган одамининг 50-йиллигига бағишланган эди. Ўшанда дунёнинг турли бурчакларидан 1700 дан ортиқ меҳмонлар, жумладан, Аполлон миссионерлари ва Халқаро космик станциясининг космонавтлари ташриф буюришган.