Тошкент, Ўзбекистон (UzDaily.uz) — 4 июль куни Андижон вилоятида ички ишлар органи ходимини ўлдиришда гумон қилинган шахс қўлга олинди. Бу ҳақда ИИВ матбуот хизмати хабар берди.

Жиноятчи эрталаб соат 06:30 06:30 ларда Хўжаобод туманида жойлашган «Юксалиш» маҳалласи “Сўқолоқ“ қабристонидаги маккапоя ичида яшириниб ётганлиги аниқланган, қўлга олиш жараёнида у ўзининг қорин қисмига пичоқ билан жароҳат етказган ҳамда биринчи тез тиббий ёрдам кўрсатилиб, шифохонага олиб борилган.

Ҳозирда мазкур ҳолат юзасидан Ўзбекистон Республикаси Жиноят кодексининг 97-моддаси 2-қисми «г» банди билан жиноят иши қўзғатилган ҳамда тергов ҳаракатлари олиб борилмоқда.

Ички ишлар вазирлиги жиноятчини қўлга олишда ёрдам берган фуқароларга миннатдорчилик билдирди.

Эслатиб ўтамиз, фожиа 1 июль куни Андижонда содир бўлган эди. Уни қўлга олишга уриниш чоғида маст ҳолатда бўлган шахс инспекторнинг кўкрак қисмига пичоқ билан уриб, сўнг воқеа жойидан қочиб кетган. Жароҳат олган ходим олган жароҳатдан вафот этган. Дафн маросими куни вилоят ҳокими иштирок этган, Ички ишлар вазирлиги марҳумнинг оила аъзолари ва яқинларига ҳамдардлик билдирган.