Toshkent, O‘zbekiston (UzDaily.uz) — Yandex Uzbekistan telegram-kanallarda reklamalarni avtomatik joylashtirish vositasini sinovdan o‘tkazmoqda. Kanallar egalari reklamadan pul ishlashning oddiy usuli bilan ta’minlanadi.

Reklama rasm yoki video va reklama qilinayotgan mahsulot yoki xizmatning saytiga havola bo‘lgan oddiy post ko‘rinishida bo‘ladi.

Neyron tarmoqlar har bir e’lon uchun mavzu va tarkibini hisobga olgan holda kanallarni tanlaydi. Texnologiyalar reklama beruvchilarga maqsadli auditoriyani, kanallarga esa xabarlar orasida organik ko‘rinishga ega bo‘lgan reklamani topishga yordam beradi.

Reklama beruvchilar faqat kliklar uchun pul to‘laydi, shuning uchun yangi vositadan nafaqat brend haqidagi xabardorlikni oshirish, balki savdoni oshirish uchun ham samarali foydalanish mumkin. "PS Cloud Services" marketing rahbari Natalya Zverevaning fikricha, faqat foydalanuvchilarning foydali harakatlari uchun to‘lash imkoniyati byudjetni yanada samarali sarflashga yordam beradi va investitsiyalar rentabelligini oshiradi. Targeting sozlamalari va kanallarning xilma-xilligi orqali maqsadli auditoriyani jalb qilish va minimal xarajatlar bilan sifatli lidlarni olish mumkin.

"Beeline Uzbekistan" kompaniyasining raqamli xizmatlar marketingi bo‘yicha katta eksperti Mirmuhammad Mirmahmudovning qo‘shimcha qilishicha, Yandex Ads vositasi ko‘plab telegram-kanallarda reklamalarni avtomatik joylashtirish imkonini beradi. "Bu reklama kampaniyalarini boshlash uchun vaqt va kuchni sezilarli darajada tejaydi," —deydi ekspert.

Telegram-kanallar reklama ko‘rsatishdan daromad oladi. Yandex Uzbekistan o‘zbek va rus tilidagi kanallar bilan hamkorlik qiladi. Hatto tor mavzudagi va auditoriyasi kichik — 2000 obunachidan iborat kanallar ham reklamadan daromad olishlari mumkin.

Telegram-kanal egasi reklama postlari qaysi kunlarda va qaysi vaqtda chiqishini mustaqil ravishda hal qiladi, maxsus bot esa reklama e’lon qiladi. Bitta kanalda kuniga 3 tagacha reklama postlari chiqishi mumkin.

Test-Uz.Ru ta’lim telegram-kanali egasi Rahim Yermatov allaqachon Yandex Uzbekistan bilan hamkorlikni boshlagan. Yandex monetizatsiyasining afzalligi reklama beruvchilar bilan hamkorlik qilish shart emasligida. Reklama chiqaradigan botni qo‘shish kifoya. Bunda reklama materiallarining chiqish grafigini va reklamani tanlash strategiyasini sozlash mumkin.

Hozircha mahsulot yopiq beta-sinov rejimida ishlaydi. Yandex bilan pul ishlashni boshlash uchun telegram-kanalni saytda ro‘yxatdan o‘tkazish va tekshiruvdan o‘tishini kutish kerak. Telegramda reklama kampaniyasini Yandex Ads servisi orqali ko‘rsatiladigan joyni — "telegram-kanallar"ni tanlash orqali boshlash mumkin.