Toshkent, O‘zbekiston (UzDaily.uz) — Sirdaryo viloyati hokimi vazifasini bajaruvchi Erkinjon Turdimov Xitoy Xalq Respublikasining Shinjon-Uyg‘ur avtonom rayoni xalq hukumati kotibiyati rahbari o‘rinbosari Chjan Szinpin boshchiligidagi delegatsiya bilan uchrashuv o‘tkazdi.

Uchrashuvda ikki tomonlama hamkorlikni rivojlantirish, qo‘shma loyihalarni amalga oshirish va do‘stona munosabatlarni yana-da mustahkamlash masalalari muhokama qilindi.

E.Turdimov Sirdaryo viloyatida qishloq xo‘jaligida yuqori samaradorlikka erishilayotganini, sanoat va qayta ishlash sohalarida katta imkoniyatlar mavjudligini taʼkidladi. Shu bilan birga, ikki mamlakat tadbirkorlari ishtirokida amalga oshirilayotgan qo‘shma loyihalarning ikki tomon uchun ham manfaatli ekanligini qayd etdi.

O‘z navbatida Chjan Szinpin Sirdaryo viloyatida qo‘lga kiritilayotgan yutuqlar, xususan paxtachilik va qishloq xo‘jaligidagi ijobiy natijalarni yuqori baholadi. U SHUAR tadbirkorlari O‘zbekiston bilan, ayniqsa Sirdaryo viloyati bilan qishloq xo‘jaligi, sanoat va logistika sohalarida hamkorlikni kengaytirishdan manfaatdor ekanini bildirdi.

Muloqot samimiy va do‘stona ruhda o‘tib, ikki tomon birgalikda amalga oshiriladigan yangi qo‘shma loyihalar yuzasidan kelishib oldilar.