Toshkent, O‘zbekiston (UzDaily.uz) — Ukraina fintex-startapi Fintech Farm O‘zbekistonda yangi loyiha — Tezbank neobankini ishga tushirdi. Loyiha mahalliy Hamkorbank bilan hamkorlikda amalga oshirilmoqda. Kompaniya uchun bu beshinchi bozor bo‘lib, undan oldin Ozarbayjon, Qirg‘iziston, Hindiston va Vyetnamda ish boshlagan.

Fintech Farm asoschisi Dmitriy Dubiletning taʼkidlashicha, O‘zbekistonga kirishdan oldin jamoa bir nechta banklar bilan muzokaralar olib borgan, biroq oxir-oqibat Hamkorbankni tanlagan. Ilgari kompaniya Ozarbayjonda Leobank, Qirg‘izistonda Simbank, Hindistonda Roarbank va Vyetnamda Liobank loyihalarini amalga oshirgan. Shu bilan birga, Nigeriyadagi urinish muvaffaqiyatsiz tugadi — u yerdagi neobank 2023 yilda yopilgan.

Tezbank mahalliy bozorda raqobatni qulay va funksional mobil ilovasi orqali olib borishni ko‘zlamoqda. Dubilet taʼkidlaganidek, Fintech Farm‘ning turli bozorlardagi asosiy mahsulotlari Ukrainadagi monobank modelini aks ettiradi — o‘xshash shartlar va xizmatlar bilan.

Hozirning o‘zidayoq Hamkorbank asosida mijozlarga 50 mln so‘mgacha (hozirgi kurs bo‘yicha taxminan $4000) kredit limitiga ega bepul karta taklif qilinmoqda. Karta 62 kungacha imtiyozli muddat hamda xaridlardan 10 foiz keshbekni nazarda tutadi.

2024 yil may oyida Forbes Ukraine Fintech Farm‘ning Qirg‘iziston, Hindiston va ehtimolan Marokashga kengayish rejalari haqida yozgan edi.

Shunda kompaniya $32 mln investitsiya raundini uzaytirishini maʼlum qilgan, raundning yetakchi investori London fond birjasida aksiyalari muomala qiladigan Bank of Georgia bo‘lgan. 2023 yilda mablag‘ jalb qilinganidan so‘ng Fintech Farm‘ning bahosi $100 mln‘dan oshdi, 2024 yil boshida esa kompaniya 40 ta yangi ish o‘rni ochdi, shu jumladan ukrain mutaxassislari uchun ham.

Fintech Farm — 2020 yilda ukrain tadbirkorlari Dmitriy Dubilet, Aleksandr Vityaz va Nikolay Bezkrovniy tomonidan asos solingan Londondagi fintex-kompaniya. Startapning biznes-modeli milliy banklar bilan hamkorlikda neobanklar tashkil etishga asoslangan. Bugungi kunda kompaniyaning loyihalari Ozarbayjon, Vyetnam, Qirg‘iziston, Hindiston va endi O‘zbekistonda ham faoliyat yuritmoqda.