Toshkent, O‘zbekiston (UzDaily.uz) — Istanbul Bosh prokuraturasining topshirig‘iga binoan 106 nafar gumonlanuvchiga nisbatan hibsga olish orderlari berildi, ular orasida shahar meri ham bor. Bu haqda Turkiya adliya vaziri Yilmaz Tunch maʼlum qildi.

Vazirning tushuntirishicha, prokuratura ikki mustaqil tergovni olib bormoqda. Birinchi tergov – terrorchilik jinoyatlarini tergov qilish byurosi tomonidan o‘tkazilmoqda. Uning doirasida munitsipalitet rahbari ham kiritilgan holda yetti kishi hibsga olindi. Ularga terrorchilik tashkilotiga ko‘maklashish ayblovi qo‘yilgan.

Ikkinchi tergov uyushgan jinoyatchilikka qarshi kurash byurosi tomonidan olib borilmoqda. Bu doirada Istanbul meri ham kiritilgan holda 100 kishiga nisbatan hibsga olish orderlari berilgan. Ularga pora olish, tovlamachilik, tenderlarda manipulyatsiya qilish, juda katta miqdordagi firibgarlik, shuningdek, jinoiy guruh tarkibida shaxsiy maʼlumotlarni noqonuniy olish va foydalanish ayblovlari qo‘yilgan.

Adliya vaziri Yilmaz Tunch tergov harakatlari aniq dalillarga asoslanganini taʼkidladi. Ular qatoriga MASAK moliyaviy hisobotlari, soliq auditi, bank hujjatlari va guvohlarning ko‘rsatmalari kiradi. U tergov jarayoni barcha huquqiy meʼyorlar va adolat tamoyillariga rioya qilingan holda olib borilayotganini tasdiqladi.

Shuningdek, vazir Turkiya sud tizimi mustaqil faoliyat yuritishini va adolat turk xalqi nomidan xolis sudlar tomonidan amalga oshirilishini eslatib o‘tdi. Uning so‘zlariga ko‘ra, barcha fuqarolar qonun oldida tengdir, Konstitutsiyaning 138-moddasiga ko‘ra, sud organlari tashqi bosimlarsiz qaror qabul qiladi.

«Hech bir shaxs yoki guruhga alohida imtiyozlar berilmaydi. Sudlar ishiga hech qanday tuzilma, institut yoki shaxs aralashishga haqli emas», — dedi vazir.

Shuningdek, u noto‘g‘ri maʼlumot tarqatish, sud jarayonini siyosiylashtirish va adolatga bosim o‘tkazish urinishlaridan ogohlantirdi. «Agar ayblovlar qo‘yilgan bo‘lsa, ularni ko‘rib chiqish joyi – sud, ko‘chalar emas», — deya qayd etdi u.

Yilmaz Tunch mazkur tergov jarayonini mamlakat prezidenti bilan bog‘lashga bo‘lgan urinishlarni qoraladi va sud hokimiyati ijro va qonunchilik organlaridan mustaqil faoliyat yuritishini taʼkidladi. «Har qanday sudyalarga qarshi hujumlar, tahdidlar yoki tahqirlash demokratiyali davlatda yo‘l qo‘yilmaydi», — deb qo‘shimcha qildi u.

Vazir tergov yakunlarini kutish va Turkiya huquq tizimiga ishonch bildirishga chaqirdi. «Barcha ayblovlar, dalillar va himoya tomonining dalillari maksimal darajada sinchiklab o‘rganiladi. Maxfiylik rejimi bekor qilinganidan so‘ng jamoatchilik barcha faktlarni to‘liq ko‘rish imkoniyatiga ega bo‘ladi», — deya xulosa qildi u.