Toshkent, O‘zbekiston (UzDaily.uz) — Toshkent shaharlararo iqtisodiy sudi Yakkasaroy tumanida olib borilayotgan qurilish ishlarini to‘xtatish to‘g‘risida qaror qabul qildi.

Bunday qaror qabul qilinishiga O‘zbekiston Madaniy meros agentligining taklifi asosida Madaniyat va sanʼatni rivojlantirish jamg‘armasi tomonidan berilgan murojaat sabab bo‘ldi. Qonunbuzarliklar bilan olib borilayotgan qurilish ishlari O‘zbekiston Amaliy sanʼat muzeyiga — Toshkent modernizmining yorqin namunasi va madaniy meros obyektiga zarar yetkazishi mumkin edi.

O‘zbekiston Amaliy sanʼat muzeyi nafaqat bebaho badiiy anʼanalarni saqlaydigan markaz, balki Toshkentning tarixiy va madaniy yuzini aks ettiradigan arxitektura yetukligining bir qismi hisoblanadi. Bunday obyektlarni asrash mamlakatning tarixiy merosini himoya qilishda muhim ahamiyat kasb etadi.

Sud tomonidan o‘rganilgan hujjatlarga asosan, qurilish ishlari belgilangan tartib-qoidalarga zid ravishda amalga oshirilayotgani aniqlandi. Ularning davom etishi madaniy meros obyektiga tuzatib bo‘lmaydigan zarar yetkazishi mumkin edi. Shu sababli sud qurilish ishlarini zudlik bilan to‘xtatish, noqonuniy qurilgan inshootlarni demontaj qilish va hududni avvalgi holatiga keltirish haqida qaror chiqardi.

O‘zbekiston Madaniyat va sanʼatni rivojlantirish jamg‘armasi Toshkentning tarixiy muhitini saqlash muhimligini taʼkidlab, madaniy va tarixiy ahamiyatga ega hududlarda qurilish loyihalarini amalga oshirishda qonunchilik talablariga qatʼiy rioya qilishga chaqirmoqda.

Sudning mazkur qarori shaharning arxitektura merosini himoya qilish borasidagi muhim qadamlardan biri bo‘lib, shaharsozlik faoliyatiga masʼuliyat bilan yondashish zarurligini yana bir bor eslatib o‘tdi.

Madaniy merosni saqlash — faqatgina tarixiy masala emas, balki kelajak avlodlar oldidagi masʼuliyatdir.