Toshkent, O‘zbekiston (UzDaily.uz) — Sirdaryo viloyatida xizmat mavqeidan foydalanish bilan bog‘liq holat ro‘y berdi. Bu haqda viloyat hokimi Erkinjon Turdimov maʼlum qildi.

Uning so‘zlariga ko‘ra, obodonlashtirish brigadasi rahbari o‘z qo‘l ostida ishlovchi xodimalardan birini o‘z nomiga kredit rasmiylashtirishga majburlagan. Keyin esa ushbu mablag‘lar evaziga rafiqasi bilan birga haj safariga jo‘nab ketgan.

Qarz olishga majbur bo‘lgan ayol og‘ir ahvolga tushib qolgan. Hokimning taʼkidlashicha, u hatto joniga qasd qilish haqida o‘ylagan.

Turdimov taʼkidlashicha, brigadir dastlab chaqiruvlarga javob bermagan, ammo voqea jamoatchilikka maʼlum bo‘lgandan so‘nggina qarzni to‘lashga kirishgan.

Hozirda kredit to‘liq qaytarilgan. Viloyat adliya boshqarmasi ushbu holat yuzasidan tekshiruv ishlarini boshladi.