Toshkent, O‘zbekiston (UzDaily.uz) — Raqamli texnologiyalar vazirligida YUNESKO tashabbusi bilan “O‘zbekistonda sun’iy intellektga tayyorlikni baholash metodologiyasi (RAM)” loyihasi boshqaruv qo‘mitasining yig‘ilishi o‘tkazildi.

Tadbirda Prezident administratsiyasining Moliyaviy texnologiyalar, raqamlashtirish va sun’iy intellekt bo‘yicha departamentining rahbari Bobur Xodjayev, Raqamli texnologiyalar vaziri birinchi o‘rinbosari Oleg Pekos va YUNESKOning O‘zbekistondagi vakili Sara Noshadi nutq so‘zladilar.

Yig‘ilish davomida loyiha doirasida amalga oshirilayotgan ishlar yuzasidan ma’lumot berildi. Shuningdek, tadqiqotning huquqiy, ijtimoiy-madaniy, ilmiy, iqtisodiy va texnologik yo‘nalishlarda erishilgan dastlabki natijalari taqdim etildi.

Uchrashuv yakunida manfaatdor tomonlarni kengroq jalb etish, loyiha taqvimini zaruratga ko‘ra moslashtirish, kelgusida o‘tkaziladigan boshqaruv qo‘mitasining ikkinchi yig‘ilishi hamda YUNESKO Bosh konferensiyasi doirasidagi tadbirga tayyorgarlik masalalari belgilab olindi.