Toshkent, O‘zbekiston (UzDaily.uz) — Namangan viloyati IIB YHXB matbuot xizmati xabariga ko‘ra, Qamchiq dovonida bir sutka ichida yuk avtomobillari ishtirokida ikki yirik yo‘l-transport hodisasi sodir bo‘lib, uch kishi hayotdan ko‘z yumdi.

Birinchi baxtsiz hodisa 28 avgust kuni soat 04:40 da A-373 trassasida ro‘y bergan. “Lacetti” avtomobili bir yo‘nalishda harakatlanayotgan yuk mashinasi bilan to‘qnashgan. Yo‘lovchilardan biri hodisa joyida halok bo‘lgan, yana bir jabrlanuvchi shifoxonaga yetkazilgan.

Ikkinchi hodisa shu hududda soat 08:39 da sodir bo‘lgan. “Cobalt” avtomobili haydovchisi boshqaruvni yo‘qotib, o‘ng qatnov yo‘lagidan harakatlanayotgan yuk mashinasiga borib urilgan, so‘ng yana bir yuk avtomobili bilan to‘qnashgan. Natijada yengil mashinadagi ikki yo‘lovchi olgan jarohatlari sababli halok bo‘lgan.

Har ikki holat yuzasidan Pap tumani IIB TERB tergov bo‘limi tomonidan Jinoyat kodeksining 266-moddasi 2-qismi asosida jinoyat ishi qo‘zg‘atildi. Tergov ishlari olib borilmoqda.