Toshkent, O‘zbekiston (UzDaily.uz) — O‘zbekiston Prezidenti Shavkat Mirziyoyev 20 avgust kuni tadbirkorlar bilan uchrashuv chog‘ida kapital jalb qilishni soddalashtirish va kompaniyalarga investorlar bilan to‘g‘ridan-to‘g‘ri ishlash imkonini berishga qaratilgan yangi investitsiya platformasi yaratilishini eʼlon qildi.

Davlat rahbari taʼkidlashicha, amaldagi meʼyorlarga ko‘ra, investorning loyihaga qatnashishi uchun uni masʼuliyati cheklangan jamiyatning taʼsischilari tarkibiga kiritilishi talab etiladi. Bunday sxema ko‘pchilikka maqbul kelmaydi va natijada biznesni moliyalashtirishning asosiy yuki banklar zimmasiga tushishda davom etmoqda.

Yangi investitsiya platformasi esa vaziyatni o‘zgartirishi kerak. Endi kompaniyalar unda o‘z loyihalarini taqdim etishi, investorlar esa sarmoya kiritish uchun eng jozibador yo‘nalishlarni tanlashi mumkin bo‘ladi.

Prezidentning so‘zlariga ko‘ra, ushbu instrument tadbirkorlarga har yili qo‘shimcha bir milliard AQSH dollarigacha investitsiya jalb etish imkonini beradi.