Toshkent, O‘zbekiston (UzDaily.uz) — O‘zbekiston Savdo-sanoat palatasi raisi o‘rinbosari Dilshod Rasulov hamda Vetnamning "FPT Corporation" kompaniyasi prezidenti Tran Dang Xoa boshchiligidagi ishbilarmonlar delegatsiyasi ishtirokida uchrashuv bo‘lib o‘tdi.

“FPT Corporation” – Vetnamning yetakchi IT kompaniyasi hisoblanadi. 1998-yilda tashkil etilgan. Bosh ofisi Xanoyda joylashgan. Mutaxassis va xodimlar soni - 70 ming. Dunyoning 19 mamlakatida, jumladan, AQSH, Yaponiya, Germaniya, Fransiya, Slovakiya, Singapur, Malayziya va Avstraliyada o‘z bo‘linmalarini ochgan. IBM, Microsoft, Oracle, Data Card, Siemens, Airbus, Amazon kabi yirik kompaniyalar bilan hamkorlik qiladi.Yillik savdo aylanmasi - $5 mlrd.

Uchrashuv davomida O‘zbekiston hamda Vetnam o‘rtasidagi hamkorlik aloqalari hamda IT sohasi bo‘yicha yaratilayotgan keng sharoitlar va istiqbollar bo‘yicha muzokaralar olib borildi.

Shu bilan birga, O‘zbekistonga investitsiya kiritish, IT sohasida qo‘shma loyihalarni amalga oshirish, mutaxassislar tayyorlash bilan bog‘liq masalalar ko‘rib chiqildi.

Xususan, barcha Markaziy Osiyo davlatlari uchun xizmat qiluvchi Vetnamning "FPT Corporation" kompaniyasining O‘zbekistonda vakolatxonasini ochish hamda ushbu kompaniya orqali turli mintaqa va mamlakatlarga autsorsing xizmatini yo‘lga qo‘yishga kelishib olindi.