Toshkent, O‘zbekiston (UzDaily.uz) — O‘zbekiston Prezidenti huzuridagi Milliy ijtimoiy himoya agentligi amaldagi qonunchilikka bolalarni zo‘ravonlikdan himoya qilishni kuchaytirishga qaratilgan o‘zgartishlar kiritish tashabbusi bilan chiqdi. Bu haqda agentlik direktori birinchi o‘rinbosari Shaxnoza Mirziyoyeva Instagram orqali maʼlum qildi.

U o‘z murojaatida jamiyatda dolzarb bo‘lgan muammoni ko‘tarib chiqdi: «Men ko‘pincha shunday savol ustida o‘ylanaman: katta inson qaysi paytda bolada insonni ko‘rmay qo‘yadi? Qachon asabiylik zo‘ravonlikka bahonaga aylanadi?»

Shaxnoza Mirziyoyeva taʼkidlashicha, bolani himoya qilish tashqi shart-sharoitlarga bog‘liq bo‘lmasligi kerak: «Bola himoya huquqiga “yetib borishi” shart emas. Bu huquq unga birinchi nafasidanoq tegishli bo‘lishi kerak — hech qanday shart-sharoitlarsiz».

Uning so‘zlariga ko‘ra, so‘nggi oylarda Milliy ijtimoiy himoya agentligi bolalarga nisbatan zo‘ravonlikning oldini olish bo‘yicha o‘z faoliyatini izchil ravishda kuchaytirmoqda va endi bu ish sifat jihatidan yangi bosqichga ko‘tarilmoqda.

Tashabbus doirasida agentlik bolalarga nisbatan zo‘ravonlik uchun javobgarlikni kuchaytirishga qaratilgan Jinoyat kodeksi va Jinoyat-protsessual kodeksiga o‘zgartishlar ustida ish olib bormoqda. Maqsad — bunday jinoyatlar uchun jazoni muqarrar, adolatli va maksimal darajada og‘ir qilish, yengillashtiruvchi holatlarni inobatga olish imkoniyatini yo‘qqa chiqarishdir.

Ichki ishlar vazirligi, Sog‘liqni saqlash vazirligi hamda Maktabgacha va maktab taʼlimi vazirligi vakillari ishtirokida idoralararo ishchi guruh tuzilgan. Asosiy takliflar qatoriga bolaga shikast yetkazgan shaxslarga nisbatan sanksiyalarni kuchaytirish, zo‘ravonlik sodir etganlarga bolalar bilan ishlash huquqidan umrbod mahrum etish hamda jabrlanuvchilarni real himoya qilish va javobgarlikni taʼminlaydigan yagona protokollarni joriy etish kiradi.

«Men ishonmaymanki, zo‘ravonlik tasodif. Bu — har doim katta insonning ongli tanlovidir. Demak, javob sifatida boshqa qaror qabul qilinishi kerak — buni to‘xtatish. Uni oqlamaslik. Ko‘z yummaslik. Chunki aksincha qilsak, odam deyish huquqimizni yo‘qotish xavfi bor», — deya o‘z so‘zini yakunladi Shaxnoza Mirziyoyeva.