Toshkent, O‘zbekiston (UzDaily.uz) — Turizm qo‘mitasi raisi Umid Shadiyev Doha shahrida o‘tkazilgan “O‘zbekiston-Qatar” xalqaro turizm forumi doirasida qatarlik tadbirkor va jamoat arbobi Zaid Al-Hamdan bilan samarali uchrashuv o‘tkazdi.

Zaid Al-Hamdan shuningdek, “Armasite Group” raisi, “Canadian Qatari Business Council” rahbari hamda AQShning “US21” korporatsiyasining mintaqaviy vakili sifatida faoliyat yuritadi.

Suhbat davomida asosiy e’tibor O‘zbekistonning sayyohlik salohiyatini Qatarda targ‘ib qilish masalalariga qaratildi. Tomonlar O‘zbekistonni Buyuk Ipak yo‘lining boy merosi, islom madaniyati va zamonaviy sayohat, dam olish hamda ziyorat infratuzilmasiga ega bo‘lgan noyob madaniy-tarixiy yo‘nalish sifatida barqaror imidjini shakllantirish imkoniyatlarini muhokama qildilar. 

Zaid Al-Hamdan O‘zbekistonni Qatar Airways aviakompaniyasi bortida va raqamli kanallarida targ‘ib qilishga, jumladan, bort jurnalida maqolalar, samolyotdagi ko‘ngilochar tizimda videoroliklarni joylashtirish orqali O‘zbekistonni arab mamlakatlaridan keladigan sayyohlar uchun yangi jozibador manzil sifatida taqdim etishga qiziqish bildirdi. 

Bu mamlakatning sayyohlik jozibadorligini keng xalqaro auditoriyaga, shu jumladan tranzit yo‘lovchilar va arab mamlakatlaridan bo‘lgan potensial sayohatchilarga yetkazish imkonini beradi.