Toshkent, O‘zbekiston (UzDaily.uz) — Joriy yilning 6-noyabr kuni O‘zbekiston Respublikasi Investitsiyalar, sanoat va savdo vaziri Laziz Kudratov Islom taraqqiyot banki prezidenti Muhammad al-Jassir bilan videokonferensiya tarzida muzokaralar o‘tkazdi.

Muzokaralar chog‘ida 2022-2026 yillarga mo‘ljallangan ITBning O‘zbekiston bo‘yicha Strategiyasi bandlarini amalga oshirishning borishi muhokama qilindi. Qayd etilishicha, jalb qilingan investitsiyalar hajmi belgilangan rejalarga to‘g‘ri keladi va 2026-yil yakuni bo‘yicha 1,2 milliard dollarlik umumiy ko‘rsatkichning 50 foizini tashkil etadi. Shu bilan birga, xususiy sektorni qo‘llab-quvvatlash bo‘yicha loyihalar ITB ITFCning sho‘ba korxonasi – Xalqaro Islom savdo va moliya korporatsiyasi tomonidan muddatidan ikki yil oldin amalga oshirilmoqda, va bugunga kelib umumiy hajmning 90 foizini tashkil etadi.

Tomonlar, shuningdek, davlat-xususiy sheriklik (DXSh) tamoyillari asosida birgalikda tuzilgan yangi loyihalarni amalga oshirish bo‘yicha keyingi qadamlarni ham muhokama qildilar. Bu loyihalar energetika, transport infratuzilmasini rivojlantirish, irrigatsiya va suv resurslarini boshqarish, ta’lim va sog‘liqni saqlash sohalariga taalluqlidir.

ITB rahbariyati loyihalarni har tomonlama qo‘llab-quvvatlashni davom ettirishga, jumladan, yashil iqtisodiyotga o‘tish doirasida innovatsiyalar va texnologik modernizatsiyaga qo‘shimcha mablag‘lar ajratishga tayyorligini bildirdi.

Muzokaralarda O‘zbekiston va Islom taraqqiyot banki o‘rtasidagi mamlakatni barqaror rivojlantirish va aholi turmush darajasini oshirishga qaratilgan hamkorlikning mustahkamligi va dinamikasi tasdiqlandi.