Toshkent, O‘zbekiston (UzDaily.uz) — O‘zbekiston va Iordaniya kaliy va fosfor o‘g‘itlarini ishlab chiqarish bo‘yicha qo‘shma loyihalarni amalga oshirishga kelishib oldi. Bu haqda “O‘zkimyosanoat” AJ boshqaruv raisi Odil Temirov “O‘zbekiston 24” telekanaliga bergan intervyusida maʼlum qildi.

Uning so‘zlariga ko‘ra, kelishuvlarga ikki mamlakat vakillari ishtirokidagi muzokaralar va biznes-forum doirasida erishilgan. Temirov taʼkidlashicha, O‘zbekistonda kaliy va fosfor xomashyo konlari mavjud bo‘lib, bu qo‘shma ishlab chiqarishlarni yo‘lga qo‘yish uchun qulay sharoit yaratadi.

«Biz iordaniyalik kompaniyalarga ushbu loyihalarni amalga oshirishda saʼy-harakatlarni birlashtirishni taklif etdik», — dedi u.

“O‘zkimyosanoat” rahbari shuningdek, Iordaniyada fosfor va kaliyni qayta ishlashga ixtisoslashgan yirik ishlab chiqarish quvvatlari mavjudligini, ular asosan eksportga yo‘naltirilganini qayd etdi. Shu bilan birga, mamlakat azotli o‘g‘itlarni Misr va Saudiya Arabistonidan import qiladi, O‘zbekiston esa azotli mahsulotlarni ishlab chiqarishda rivojlangan sanoatga ega.

Bundan tashqari, o‘zbek tomoni hamkorlarga polivinilxlorid va kalsiynlangan soda kabi kimyoviy mahsulotlar eksporti hisobiga hamkorlikni kengaytirishni taklif qildi.